7 Dag Kersfees Weskus- en Bergetoer - 22 - 28 Desember 2011

Toer datum:

KWB1/1

22 - 28 Desember 2011

Om 07:00 vertrek ons vanaf Road Lodge Airport en om 07:30 tel ons die laaste toerlede by die Fountains hotel op en vertrek na Tafelberg, die bekendste baken in Afrika en een van die belangrikste toerismebestemmings in die land! Daarna ry ons via Houtbaai en geniet ons `n rit langs die pragtige Chapmans-peak drive - een van die mooiste roetes in ons land, deur talle reisigers beskryf as die mooiste in die wêreld! Na `n lieflike dag in Kaapstad vertrek ons na Vanrhnsdorp waar ons vir die volgende 5 nagte gaan tuisgaan en elke aand aandete geniet en ontbyt die volgende oggend.

Na ontbyt vertrek ons na Gifberg wat deel uitmaak van die Matzikamaberge - die noordelikste uitloopsels van die Sederberge. Hierdie berg met sy unieke Tafelberg-sandsteen rotsformasies, plant en dierelewe laat die toeris verstom. Hier sal ons heelwat rotsformasies te siene kry wat byvoorbeeld lyk soos `n krokkedil, skilpad en dinosaurus. Ons sal ook sien hoe water deur die eeue heen `n gat in `n horisontale rots gevorm het en nou ontspring daar `n waterval deur hierdie gat. Gifberg se flaura bestaan hoofsaaklik uit fynbos en die gifboom word slegs hier aangetref, vandaar ook die naam. Hierdie plant is ook deur San mense gebruik in jag ekspedisies en talle rotskuns in die berge getuig van hierdie gebeurtenisse. Ons sal ook `n draai maak by die wêreldbekende kokerboom kwekery waar toerlede die geleentheid sal kry om `n vetplantjie saam te neem huistoe.

Na ontbyt vertrek ons na Nieuwoudtville bo-op die Bokkeveld-plato. Van bo het mens `n pragtige uitsig oor die uitgestrekte Knersvlakte. Ons sal die Nieuwoudtville-waterval en die kokerboomwoud besoek waar kokerbome by die tienduisende staan! Ons sal ook besoek aflê aan die NG-kerk wat `n baie goeie voorbeeld is van Nieuwoudtville se sandsteen-geboue. Die kerk het ook `n baie interessante geskiedenis van hoekom hulle die enigste kerk ter wêreld is wat `n monument vir skuld opgerig het. Ons sal ook die gletserspore besoek wat in die ystydperk gevorm is.

Vandag is Kersdag en ons gaan dit langs die see geniet! Middagete sal geniet word by die alom-bekende Muisbosskerm. Hierdie opelug-seekosrestaurant was die eerste van sy soort en sekerlik die bekendste. Vandag laat leef die Muisbosskerm Weskus-tradisie voort. Dit is werklik `n eet-ondervinding. Ons sal `n draai maak by voëleiland, die mees toeganklike kolonie witmalgasse in die wêreld. Daarna reis ons al langs die see en besoek die skilderagtige dorpie Doringbaai en die baie gewilde vakansiedorp, Standfontein wat hierdie tyd van die jaar `n geweumel van mense is.

Vandag besoek ons die Stadsaal grotte. Hierdie roete beloof om vol verbeeldingryke verrassings te wees wat tussen die geweldige hoë berghange en klowe verby die Algerië bosboustasie sal deurlei. Ander interessante besienswaardighede op hierdie roete is Lot-se-vrou, `n klip wat soos `n vrou wat in `n soutpilaar verander het lyk. Ons sine ook die Cederberg Wynkelder wat die hoogste en mees afgeleë wynkelder in die Weskaap is, waar die wingerd amper op die sneeuvlak groei. Ons ry nog verder die berge in en hier oppad na nêrens kry jy die afdraai na die Stadsaal grotte wat `n definitiewe hoogtepunt van ons toer is. Hierdie is ‘n deel van ons land wat nog net nie deur die toeris ontdek is nie. Hier sal ons ook seker een van die mooiste voorbeelde van Rotskuns (Boesman tekeninge) sien. Ons geniet ook hier tussen die majestuese berge 'n piekniek middagete. Dit is hier waar jou verbeelding jou in ‘n ander dimensie sal inneem. Hier kan jy vir ure lank rond dwaal sonder dat jy dieselfde ding twee keer sal sien. Hierdie is ‘n ervaring wat jy nie vir enige iemand op papier kan verduidelik nie. Dit is waar jy al die geheue van jou digitale-kamera of video kamera gaan opgebruik. Maak asseblief voorsiening vir genoeg films of geheue vir jou kamera.

Na ontbyt vertrek ons na Clanwilliam, waar ons die dag sal geniet. Ons sal goeie voorbeelde van rotskuns sien en bietjie meer uitvind oor die redes waarom die San-mense hierdie eienaardige tekeninge gemaak het. Ons sal ook besoek aflê aan die bekende digter en skrywer, C Louis Leipoldt, se graf in die Pakhuisberge, waar dit letterlik lyk of iemand die rotse bo-op mekaar gepak het. Ons volg ook verder `n pragtige roete deur hierdie gedeelte van die Sederberge, bo-oor die Pakhuispas. By Clanwilliam sal toerlede die geleentheid kry om die baie interessante museum te besoek asook die Strassberger Veldskoenfabriek en die Rooibostee fabriek.

Vandag is die laaste dag van die toer, maar ‘n interessante Weskus dag lê voor met kusdorpies wat hul eie kultuur en lewenswyse het, wat nêrens ander gevind kan word nie. Die Weskus is sinoniem met kreef, snoek, bokkoms en gasvrye “Weskus-mense. Ons dag word versier met skilderagtige seetonele en Weskus dorpies. Die Verlorenvlei en Rochers-panne is twee van die voëlkykers paradyse wat ons op die roete sal sien. Die hele Weskus sal `n geweumel van mense wees wat van heide en verre kom om hier te kom vakansie hou. Die Weskus het net `n bekoring van sy eie met interessante dorpies soos Elandsbaai waar skuite met huiskrane in die see laat sak word. Dwarskersbos is vakansies een van die gewildste kampeerdorpies lans die Weskus en die drielingdorpies Laaiplek, Port Owen en Velddrif aan die mond van die Bergrivier vorm die bokkom-hoofstad van Suid-Afrika. Ander dorpe lans ons roete is Vredenburg, Langebaan en Yzerfontein. Na `n lekker dag op die Weskus word `n sielsverrykende toer afgesluit in Kaapstad. Ons sal die eerste toerlede tussen 17h00 en 18h00 by Kaapstad Internasionale lughawe aflaai en die laaste stop sal tussen 18h30 en 19h00 by Fountains Hotel in Kaapstad wees. LW: Tye mag verskil afhangende van weersomstandighede en verkeer.

Wie is Namakwa Toere?

•           Ons is `n familie besigheid wat uit ouers en kinders bestaan

•           Ons is in die toerbedryf sedert 1985, en in die hotelbesigheid vanaf 1987. Ons het in 1993 verhuis vanaf Pretoria en het ons kom vestig in Namakwaland.

Wat doen Namakwa Toere anders?

•           Ons is nou Namakwalanders en ken ons streek. Ons doen slegs toere na ons eie streek.

•           Ons is `n familiebesigheid en is self die toergidse. Ons geregistreerde toergidse het `n passie vir hul werk en ons verseker u van die beste, vriendelikste, hulpvaardigste en bekwame toergidse!

•           Uit ondervinding weet ons dat daar toerlede is met verskillende behoeftes en daarom doen ons moeite om elke bespreking persoonlik te hanteer.

Waar bly Namakwa Toere wanneer hulle toer?

•           Namakwa Toere het `n voordeel bo ander toeroperateurs wat na Namakwaland toer omdat ons hotel in Vanrhynsdorp (Namaqualand Country Lodge) so sentraal geleë is. Dit stel ons in staat om elke aand wat ons in Namakwaland is daar tuis te gaan en vandaar elke dag uitgaan in die verskillende rigtings. Dit is baie gemakliker vir toerlede aangesien hulle nie nodig het om so baie in en uit te pak nie en ons kan self ook verseker dat toerlede die beste diens en weglê-etes geniet.

•           Wanneer ons in Namakwaland is, slaap ons by Namaqualand Country Lodge. Ons hotel se 45 kamers almal op grondvlak is en privaat badkamers het, is ons busse ongelukkig nie ingerig vir rolstoele nie. Omdat ons slegs op 1 plek tuis gaan, het ons nie nodig om „n gejaagde reisprogram te hê nie. Ons busbestuurders is nie onder druk nie. As jy saam met ons gaan toer, is jy met vakansie.

•           Ons aandetes en ontbyt by Namaqualand Country Lodge is groot etes. Ons hotel is bekend vir sy weglê-etes en ons naam loop ons vooruit daarvoor, een van Namakwa Toere se sterkste punte.

Waarmee ry Namakwa Toere wanneer hulle toer?

•           Namakwa Toere toer slegs met luukse busse, die tipe busse waarmee hoofsaaklik buitelandse toeriste vervoer word of met `n luukse mini-bus.

•           Vergewis uself van sekere noodsaaklike aspekte van ‘n “luukse bus”.

1. Gemaklike terugleun-sitplekke – dit is belangrik aangesien toerlede die meeste tyd van die toer in die bus deurbring.

2. Lugreëling – Maak seker dat die luukse bus wel hieroor beskik aangesien dit baie nodig kan raak in ons streek, veral in die warm somermaande.

3. Busbestuurder - Dit is die belangrikste van ‘n suksesvolle toer. ‘n Betroubare busbestuurder wat nie gejaag of onder druk geplaas word nie is absoluut noodsaaklik.

Indien die toergids sien dat die toergroep laat by die hotel gaan arriveer as gevolg van baie stoppe vir besienswaardighede, laat weet die toergids die hotel en alles word rondom hierdie reëling aangepas. Dit is die groot voordeel wat Namakwa Toere het om in hulle eie hotel te oornag.

Wie beheer Namakwa Toere se daagliks program?

•           Ons eie toergidse sal elke dag in beheer wees van die toerprogram. Ons is geregistreerde toergidse vir al die streke wat ons besoek.

Wat sluit Namakwa Toere se toer prys alles in?

•           Verblyf : Alle verblyf kostes is ingesluit by toerpryse.

•           Etes : 2 etes per dag is ingesluit by toerprys, behalwe dag 1 (slegs aandete) en dag 7 (slegs ontbyt).

•           Vervoer gedurende die toer per luukse bus of luukse minibus met gemaklike terug leun sitplekke asook lugversorging.

•           Geregistreerde Toergids : Ons is self die toergidse op die bus en ken ons streek baie goed.

•           Geen Toegangsfooie :  Geen toegangsfooie is ingeluit by toerprys.

Wat sluit die toerprys nie in nie?

•           Middagetes : Middagetes is nie ingesluit by toerprys, maar die kers-ete by Muisbosskerm is wel ingesluit!

•           Toegangsfooie :  Tafelberg kabelspoor - R195.00pp

                                    Clanwilliam museum - R10.00pp

                                    Gifberg - R30.00pp

                                    Lambertsbaai voëleiland - R30.00pp

                                    Stadsaal grotte - R30pp

Hoe kan Namakwa Toere help met vervoer reëlings?

•           Indien u per trein of vliegtui van Johannesburg of Durban na Kaapstad wil reis, kan ons vir u help met hierdie reëlings. Vir hierdie diens vra ons R100.00 per persoon.

•  Indien u die oggend wat die toer vanaf Kaapstad vertrek wil invlieg, moet dit voorafmet ons gereël word.

Is daar akkommodasie beskikbaar indien ek voor die tyd moet arriveer in Kaapstad?

•           Toerlede wat vroeër of langer in Kaapstad wil vertoef, kan geakkommodeer word. Ons het spesiale tariewe beding by twee verskillende hotelle in Kaapstad waar ons toer vertrek en eindig. Hierdie tarief is slegs geldig indien ons die bespreking vir u doen.

•           Kontak ons vir die tariewe vir die volgende akkommodasie opsies :

1. Fountains Hotel in Kaapstad

2. Hotel by lughawe – Road Lodge Airport

Ons beveel aan dat u van hierdie aanbod gebruik maak en die vorige dag alreeds in Kaapstad arriveer en tuisgaan by een van hierdie hotelle indien u nie familie of vriende in Kaapstad het nie. Hierdie spesiale aanbod van die hotel is ook beskikbaar indien u langer as een dag wil oorbly en Kaapstad verken voor die toer begin of nadat die toer geëindig het.

Is daar vervoer beskikbaar indien ek per vliegtuig/trein in Kaapstad arriveer, na die hotel?

•           Indien u in Kaapstad arriveer voor die aanvang van u toer, of nadat die toer geëindig het, en vervoer benodig om by u hotel te kom, kan ons u ook hiermee behulpsaam wees.

•           Kontak ons vir die tariewe wat die onderskeie vervoer-operateurs vra vir vervoer soos volg :

1. Vervoer tussen lughawe of stasie na Fountains Hotel in Kaapstad.

2. Vervoer tussen lughawe of stasie na Road Lodge Airport.

Wat gebeur as Namakwa Toere die toer kanselleer?

•           Namakwa Toere onderneem om sover dit moontlik is geen toer te kanselleer nie. Ons het nog nooit nodig gehad om ‘n toer te kanselleer nie. Indien dit ooit sou gebeur dat ons ‘n toer moet kanselleer, sal ons u gelde wat u alreeds betaal het, binne 24 uur terugbetaal met 10% rente per jaar.

•           Die rede waarom ons hierdie voorwaarde onder u aandag wil bring, is aangesien ons jaarliks ondervind dat toeriste by ander toer operateurs bespreek, gelde betaal en dan word die toer later gekanselleer. Die toeriste moet sukkel om hulle gelde terug te kry en ons het al gevalle gehad waar mense al hulle gelde by hierdie toer operateurs verloor het.

•           In baie gevalle het die toeriste alreeds vlieg reëlings getref, (hierdie gelde word nie deur die lugrederye terugbetaal na kansellasie nie). Ons het al in die verlede van hierdie toeriste tegemoet gekom en hulle op ons toere geneem, maar daar was kostes van verandering van vlieg reëlings wat hierdie toeriste aan die lugrederye moes oorbetaal.

•           Dit is jammer, maar vanjaar noem ons hierdie punte, want daar is geen reëls in die toerbedryf nie. Ons sien jaarliks hoe toerlede ingedoen word en selfs al hulle geld verloor omdat toer-operateurs ondergaan en toere kanselleer waar toerlede sukkel om hulle gelde terug te kry. Daar is selfs op die oomblik toer-operateurs wat al bankrot gespeel het waar toerlede al hulle geld verloor het, en dan begin die persoon net weer ‘n nuwe toerbesigheid onder ‘n nuwe naam en hulle gee ons bedryf ‘n baie slegte naam.

Hoe bespreek ek ‘n toer by Namakwa Toere?

•           Wanneer u besluit het om op een van ons toere te bespreek, vul die besprekings vorm in. Faks of epos die vorm dan vir ons kantoor. Die nodige sal dan deur ons gedoen word (hotel- en vlieg besprekings indien u dit so aangedui het). U sal ‘n toerverwysings-nommer en Namakwa Toere se bank-besonderhede ontvang. Hierdie toerverwysings-nommer moet op u deposito strokie aangetoon word. Hierdie toerverwysingsnommer moet ook op alle korrespondensie gebruik word vir die toer wat u bespreek het.

•           Ons verskaf nie bank besonderhede sonder ‘n besprekingsvorm nie. Die enigste rede hiervoor is dat toerlede in die verlede gelde inbetaal sonder dat hulle ‘n toer verwysings- nommer ontvang het, en dat hulle nie ‘n bespreking per faks of epos gedoen het nie. Dit het al gebeur dat voornemende toerlede gelde inbetaal het, maar dat daardie spesifieke toer alreeds vol bespreek was.

Wanneer is die toer gelde betaalbaar?

•           Deposito van R2 000.00 per toerlid is betaalbaar nadat u ‘n toerverwysings-nommer ontvang het met u bespreking.

•           Balans is betaalbaar 30 dae voor u toer se vertrekdatum.

Wat maak Namakwa Toere so suksesvol?

•           Afgesien van die familie besigheid, die beste reisprogram en die luuksste busvervoer, die hotel akkommodasie en die weglê-etes, is ons positief omtrent ons streek en oor toerisme.

•           Dit is baie maklik om ‘n bus vol toerlede te kry, maar om van hierdie toerlede te kry om weer saam met jou te toer, dit is waar die geheim lê. Namakwa Toere kry dit jaar na jaar reg om vorige toerlede te kry om weer en weer saam te toer aangesien ons elke jaar ons reisprogram aanpas.

•           Laastens, en beslis die heel belangrikste : Elkeen wat werksaam is by Namakwa Toere, en Namaqualand Country Lodge, en dit sluit alle personeel in, erken dat ons Christene is en dat ons erken ons Hemelse Vader as die Skepper van hierdie wonderwerk in Namakwaland.

Ons begin elke oggend voor ons ry met ‘n gebed, en vertrou die Here vir ‘n veilige en sielsverrykende toer.

Vriendelike Blomme en Berge groete

Namakwa Toere Span

Innes(Snr), Jenny, Mike & Innes(Jnr) Spies